SCHNELL
AWANSCHIERT
von
Stefan Heinz - Kehrer
In Arad wor mol e Schuster,
des wor de greeschti Liebeitl uf dere Welt ! Sei
Name wor Grün, un was der zammgeloo hat, is uf ke
Kuhhaut gang, wie mer so saat. Des Schlimmi wor,
daß er an sei Geloenes selwer fescht geglaabt hat,
un drvun net abgang is, wann mer ihm aa grad s Gegenteil
bewies hat !
Mer saat jo, die Schustre sin
Filosofe un Spinner, wahrscheinlich kummt des vun
dem vieli Sitze un Sinniere, die Händ arweite, awer
die Gedanke sin weit fort. Aso wär des Fantasiere
so e Art Berufskrankheit un drum tun mir dem Vetter
Grün des nohgsiehn, wann er aa manichsmol gar zu
dick ufgetraa hat.
Un jetz kummt em Vetter Grün
sei Lieblingsgschicht, was er seine zwaa Lehrbuwe
mol zum beschte gin hat. Ich wor debei geween, mei
Saldateschuh wore grad in dr Arweit...
"Aso", hat de Vetter
Grün angfang, "im erschti Weltkriech wor ich
Saldat bei dr Infanterie. Un wann mir e großi Stadt
erowert han, dann wor immer feierlichi Iwergabe:
Een General, een Owerst, e Owerstleitnant, een Major,
een Hauptmann, e Leitnant, een Fähnrich, een Stabsfeldwewel,
e Feldwewel, een Zugsfiehrer, een Kapral, een Gfreiter,
un een Saldat, aso vun jede Scharsch nor eener,
alli aus unsrer Armee, han misse debei sin, natierlich
die tapferschti. Aso - de Saldat wor ich ! Ihr kennt
eich vorstelle, wie ich mich gfiehlt han, wie so
e alter, echter Generalfeldmarschall unser Front
abgschritt is !"
Die Lehrbuwe han sich kaum zu
schnaufe getraut, awer de Vetter Grün is schun weitergang:
"Wie mir Pschemisl inghol han, wor wieder feierlichi
Iwergabe. Aso, wieder von e jeder Scharsch eene:
een General, een Owerst, na, un so nunner bis zum
Saldat."
"Un de Saldat wort Ihr,
Herr Meister", hat de eeni Lehrbu schnell geruf.
De Vetter Grün hat ne mitleidich
angschaut un gsaat: "Nee, mei Bu, desmol wor
ich de Feldwewel !" De Lehrbu hat roti Ohre
kriet un nunergschaut, awer de Vetter Grün is schun
weitergstermt: "Noh etlichi Monate han mir
wieder e großi Stadt inghol, ich men es wor Warschau,
aso wieder großi Iwergabe: Een General, een Oberst.
. ."
"Un ihr, als Feldwewel,
wieder drbei !" hat de aner Lehrbu geruf. "Was
fallt dir in?", hat de Meister gschrie, "desmol
wor ich de Hauptmann, un de Generalfeldmarschall
hat mir sogar die Hand gin !" Dann hatr weitervrzählt:
"Etlichi Monate druf han mnir wieder e großi
Stadt erowert, wieder großi Iwergabeparadi: Een
General, een Owerst... naja, un wieder so die ganzi
Reih bis unehin !" Awer keene vun dene Buwe
hat was gsaat, sie han sich nimmi getraut!
"Un desmolrum wor ich als
Owerst drbei ! Un de Feldmarschall hat mir heechstpersenlich
die Auszeichnunge an die Bruscht ghong !"
Die Lehrbuwe han vor Staune
die Arweit vergeß, awer de Vetter Grün wor nimmi
zu halle: "Un dann han mir e ganz großi Stadt
inghol - stellt eich vor, ich wor bei dr Iwergabe
wiedrum drbei !"
Jetz is mir awer die Geduld
verriß un ich han geruf: "Na, jetz saat nor
net, daß Ihr schun General wort! "Wu denkt
Ihr hin !" hat de Vetter Grün gsaat, "ich
wor jo de Generalfeldmarschall, der was die Paradi
abghol un die Auszeichnunge vrteelt hat!"
Es Wort is mer im Hals
steche geblieb. Un bevor ich mich gfaßt han, hat
de Meister Grün noch gsaat: "Un so sin ich
de enzichi Generalfeldmarschall uf dr ganzi Welt,
was aa e Zivilberuf hat !"
DE
NACHTWÄCHTER VUN ZAMPHEDER
von Stefan Heinz - Kehrer
Vor lange, lange Johre, s is
schun bal nimmi wohr, wor de Vetter Franz Nachtswächter
in Zampheder. Er hat in de "Vorstadt"
gewohnt. (Die "Vorstadt" in Zampheder
is dort, wu de Wech ins Dorf nunrzusich geht un
de Floriani steht, mitte in de Gass.)
Eemol, am me Winterowed hat
de Vetter Franz wie immer sei Dienst vrsiehn - awr
s wor so bitter kalt. De Schnee hat - uner de Fiess
geknirscht, un vun de Marosch riwer hat e scharfe
Wind geblos, daß em schiers Herz im Leib vrfror
is, m Vetter Franz hats gegruselt vor dere langi
Nacht...
Endlich is s halwer zehn gen,
die letzte Buwe un Mädcher sin aus de Reih hemgang
un han sich in de Gasse vrlor — do hat aa de
Vetter Franz sichs korz iwerleet —un is aa
hem. Er hat sich in de warm Stub ufs Kanebett ghuckt
un is aa bal selich ingschlof. Awr sei Weib, die
Wess Liss, hat owacht gen, wie e Haftlmacher —
un immer wann die Uhr die Stun gschlaa hat, hat
se geruf: "Franz, steh uf, die Uhr hat gschlaa!"
No is de Vetter Franz hortich uf, hats Finster ufgemach
un mit seiner Blos die Stune geblos. No hatr s Finster
wiedr zugemach un weidergschlof ...
De anre Morjet is die Nochberin,
die Wes Marjan, glei ins Gmeindehaus gelaaf un hat
gsaat: "Herr Richter, ich han e Klaach. De
Vetter Franz wor heit nacht nit im Dienst, er hat
die Stune zum Finster nausgeblos !" "Is
des wohr?" hat de Richter gfroot. "Jo,
des is wohr", hat die Wes Marjan gsaat, alli
Leit in de Gass kenne des bezeie!"
De Richter hat glei de Klerichter
nom Vetter Franz gschickt. De Vetter Franz is aa
kumm un hat sich vor de Richter gschtellt: "Herr
Richter, dir hat mich rufe geloss." De Richter
hat sei strengstes Amtsgsicht gemach un hat —
vor alle Leit — gsaat: »Vetter Franz, gegr
eich is e K1aach vorgebrung gen. "Was for e
Klaach ?" froot verwunert de Vetter Franz.
"Ei, heit nacht wortr nit im Dienst uf de Gass,
dir hat die Stune dorchs Finster geblos".
"Des is nit wohr",
hat de Vetter Franz hart geruf, "ich han nit
dorchs Finster, ich han dorch mei Blos geblos !"
WER
HAT DE RAHM AUSGELECKT?
von Stefan Heinz - Kehrer
Die Oschtermer sin frieher
viel mit Butter, Rahm un Aier uf de Hatzfelder Wuchemark
gfahr oder gang, je nodem, ob se Waan un Pherd ghat
han odr net. De Hatzfelder Wuchemark im Zentrum,
dort, wu de Floriani mitte in de Gass steht un ausschaut,
obs net irgendwo brennt.
Eemol, an so me Marktach,
hat die Wes Liss vun Oschtre Pech ghat. De Mark
war schun ziemlich rum, die "herrisch"
Hausfraue han sich schun vrlaaf — un sie hat
die Halbscheid vum Rahm noch iwrich ghat. "Na",
hat se sich gedenkt, " jetz kann ich die schwer
Kandl nochmol hemschleppe uf Oschtre un in me Tach-zwaa
nochmol her, fallt mr gar net in!"
Korzentschloss hat se ihre
Rahmkandl zum Floriani getraa un hat gsaat: "Do
stell ich dr mei Rahm hin gef owacht druf, brenne
tuts sowieso net, un anres hascht eh nix zu tun.
Morje hol ich ne ab. Un als Hieterlohn vrsprech
ich dr e scheeni Kerz!"
Un fort war se! — Gegr
Owed sin zwaa Schustrbuwe am Floriani vorbeikumm
un han die Rahmkandl entdeckt. Un weil se stark
neigierich wore, han se aa gleich gschaut, was drin
wor. Sie han prowiert, han vrkoscht, un no han se
"schluckzessiewe", wie mr des uf herrisch
saat, de Rahm ausgetrunk.
"Awr was jetz?"
saat de kleneri vun deni Schustrbuwe. "Werd
mr do net drufkumme, dass mir des wore ?" "Nor
ke Ängschtre", hat de anri gsaat, "mir
were de Vrdacht vun uns ablenke." (Han die
selmols aa schun Krimis geles?) No hatr sich vun
seim Kumrad uf de Sockl vun dere Stadue nufhewe
geloss un hat de Rescht vum Rahm m Floriani ufs
Maul gschmiert...
De anre Morjet is die Wes
Liss vun Oschtre nochmol ufs Platz kumm un schnurstracks
zum Floriani. Die Kandl hat aa scheen ufm Platz
gstan. Wie die Wes Liss awr ninschaut, trefft se
bal de Schlach — die Kandl wor leer. "Na,
do hamrs jetz", saat se, "mr kann sich
uf niemand meh vrlosse!" — Sie hat de
Kopp ghob un hat wille e Strofpredich loslosse —
in dem Moment gsieht se, dass de Floriani e rahmvrschmiertes
Maul hat. Na — des hat noch glehlt!
"Schämscht dich net",
hat se geruf, "jetz gehscht du selwer her un
leckscht mr de Rahm aus! Uf die Kerz kannscht lang
warte, un wann du jetz menscht, dass ich dir a nochs
Maul abputze wer — no hascht dich gschniet!"
Wers net glaabt, muss mr
vor Strof e Raki zahle!
DE
NEI ANZUCH
von Stefan Heinz - Kehrer
Do neilich hat mei Bäsl Kathi
zu mir gsaat: "Matz, die aner Wuch fahre mr
in die Stadt, kriescht e neie Anzuch." "Was
dir infallt", han ich geantwort, "mei
schwarzer Anzuch is noch ganz gut, ich brauch ke
neie meh ! For die phaar Johr, was ich noch zu lewe
han..."
"Halts Maul" hat mei
Bäsl Kathi glei zruckgschrie, "ich loss dich
nimmi in so me Zustand rumlaafe! Ich wer mich doch
net auslache losse. Un in de Fasching han mr zwaa
Hochzeide in de Freindschaft, zwaamol Kindsschenk
un, wer weess, noch was. Am Dienstach fahre mr.
Un beim Vetter Lambert im 'Modern' kaafe mr e ordentliche
schwarze Stoff, de Vetter Lambert hat mich noch
immer gut bedient."
Mei Proteschte han so viel genutzt,
wie wenn ich se beim Lippaer Salzamt vorgebrung
hätt.
So sin mr halt am Dienstach
in die Stadt gfahr...
Mir sin awer net glei ins "Modern",
mei Weib hat in de Josefstadt mol so in die Gschäfter
ningeguckst.
Uf eemol saats: "Jesses,
do sin jo Kinermäntel, m Greti sei Lotte (unser
Enkelskind) breicht dringend eene for alle Tach
in die Schul. De blooi dort wär grad gut, des is
dann aa glei unser Gschenk for die Feiertäch. Hol
mr ne ?"
Ich wor invrstan — un de
Mantl wor unser.
Im Schuhgschäft saat mei Bäsl
Kathi: "Freilein, was for Nummre han die Winterschuh
dort ?"
"34. Heute bekommen."
Mei Aldi glei zu mir: "Die
suche mr schun lang, die sin form Lissi sei Helmut
(aa mei Enkelskind), un wann se zu gross sellte
sin, ziehtr halt Schofwollsocke nin an. Hol mr se?"
Ich wor invrstan — un die
Schuh wore unser.
Im e anre Gschäft saat mei Aldi:
"Die bloe Trenningsanzich dort sin praktisch
for Kiner, mr spart viel Gwand demit. Unsrem Hans
sei Erich un Walter (aa mei Enkelskiner) han noch
keeni un breichte se so notwendich. Hol mer se?"
Ich wor invrstan — un zwaa
Trenningsanzich wore unser.
Ich machs korz: Form Greti sei
Karin (aa mei Enkelskind, s klenschti) han mr noch
e teiri Pupp kaaft ("dass es doch aa e Gschenk
hat"), form Lissi sei Brigitte (aa mei Enkelskind)
e grad so teiri Pupp, ("dass ke Unerschied
gemacht werd") un form Hans sei Dagmar (aa
mei Enkelskind, s greeschti) e Material for e Seidekleid,
("dass es net als enziches nix kriet hat").
Schwer ufgepackt mit Pakete,
Schachtle un volli Netze sin mr endlich im "Modern"
ankumm. De Vetter Lambert wor freindlich, wie immer
— un bal han mr de richtich Stoff for mich
ghat.
Uf eemol werd mei Aldi blaich
un greift sich ans Herz. "Matz", hat se
gstottert, "Matz, mr han jo schun bals ganzi
Geld ausgen. Ausm Anzuch werd nix!"
De Vetter Lambert hat gschmunzlt
un hat gment, mr solle halt anersmol kumme.
Mei Aldi hat ufm ganze Hemweech
nor gsaat: "Na, so was, na so was !" Un
drletscht hat se gement: "Matz, hascht doch
recht, dei Anzuch is noch ganz gut, wann mr ne putze
losst, isr wie nei." Ich han lang nix gsaat.
Awr dann han ich mr doch die Kurasch ghol un han
gfroot: "Saa mol, Kathi, for was wor ich eigentlich
in die Stadt mitgfahr?"
Meiner Bäsl Kathi ihre Aue han
gfunkelt. No hat se eemol tief gschnauft un hat
gsaat: "E scheener Gawalier bischt! Wer hätt
mr dann die vieli Pakete traan solle!?"
BEIM
BEGLERBEG VUN TEMESCHWAR
von Stegan Heinz - Kehrer
Also, liewe Landsleit, ihr werd
jo aa geles oder gheert han, daß unsr scheeni Stadt
Temeschwar a Siewehunertjohrfeier abghal hat. Wisstr,
mit dene Städt is des so wie mit de Weiwr: Je ältr
se were, desto jingr sin se.
Also, Temeschwar is jung, des
muss mr saan. Do gets ganze Viertle, die sin erscht
een-zwaa Johr alt. Na — un so an allem, was
mr gsieht. Wie die Stadt lebt, wie se "pulsiert",
wie mr des uf herrisch nennt, wie se wachst, wie
se ausschaut — des alles is e Zeiche vun Jugend.
Weil awr doch vun 700 Johr die Red is, do bläddrt
mr halt aa in de Bicher un lest, was so frieher
gewen is in dere Stadt.
Un weil mir vun dem vieli Lese
de Kopp gebrummt hat, un weil ich oweds statt eener
glei drei Krautkneedle gess han — un mei Bäsl
Kati macht e gfilltes Kraut, oho — han ich
in de Nacht sogar gträmt.
Un des wor mei Traam: Ich geh
in meim schwowische Gwand dorch Temeschwar, awr
alles wor mir so fremd. Die Gasse krumm un schmal,
net geplaschtrt, net gekehrt — un ke Mensch
un ke Seel zu gsiehn! Uf eemol springe zwaa bärtiche
Kerle uf mich zu un schreie etwas. Ich han ke Wort
vrstan. Ufm Kopp han se e rot Kapp getraa, runderum
e weisse Fetze. Breete Gattcher han se anghat, dort
wäre drei Männer ningang. Die schwarze Aue han nor
so gfunklt. Wie se awr mit ihre krumme Säwle in
de Luft rumgfuchtlt han, hats bei mir geblitzt!
"Jessmarandjosef, Matz,
die Tirke! Matz, du bischt in tirkischer Gfangenschaft!
Liewes Kati, adje, such dr e anre, mich gsiehscht
du nimmi!" Die zwaa han mich in e grosses Haus
gschleppt, vor e grosse, dicke un starke Mann, was
in laudr Seid angezoo war. Der hat noch breederi
Gattcher getraa un e noch greessere Bart ghat. Des
wor de Beglerbeg, so e Art Kummedant. De Beglerbeg
hat mich streng angschaut un hat gfroot: "Wer
bischt du?" Ich han mei siewe Quetsche zammgerafft
un han gstottrt: "Ich sin de Matz ben Matz
ben Phedr ben Kaschpr ben Hans ben Stefan ibn Balthasar
al Josef."
De Beglerbeg hat grosse Aue
gemacht un hat gschrie: "Al Jussuf?" "Jo",
han ich gsaat. De Beglerbeg hat die zwaa Gattchermänner
nausgejaat, hat mich um de Hals ghol un hat gsaat:
"Mir sin jo Freinde, mei Urkukandl wor aa e
Jussuf!"
Glei hatr Esse un Trinke bringe
geloss, ich han mich uf e Teppich sitze misse un
han — grad so wie er — die Fiess iwernanrgschla
un han mirs schmecke geloss. Wie de Beglerbeg hechstperseenlich
de Wein ingschenkt, hatr gement: "Unser Prophet,
de gottselig Mohammed, hat jo de Alkohol vrbot —
wahrscheinlich hatr zuviel Magenseire ghat un net
trinke derfe — awr", drbei hatr mitm Au
geblinzelt, "mir holle des net so genau."
Wie mr satt wore, hatr gsaat:
"Liewer Freind Matz, jetz zeig ich dirs Schenschti,
was ich han!" '
Do wor ich awer neigierich!
Er fiehrt mich dorch e lange Gang, rechts um de
Ecke, bis vor e Gittertor. E Postn hat drvor gstan
— mit me lange Spiess. Ich han glei Angscht
kriet, ich han gement, jetz kummts Gfängnis. De
Postn macht uf, mir trete in e grosses Zimmer —
un so e Dutzend hibsche junge Weiwr stehn momentan
vun de Diwane uf un hewe de Schleier vors Gsicht.
"Runr mit die Schleier!"
hat de Beglerbeg befohl, "des is mei Freind
Matz ben Matz, der soll eich gsiehn!"
Leit, was soll ich eich saan,
ens schenr wies anr, die Haut wie Sammet, weisse,
braune un sogar schwarze Weiwr !
"Saat mol, Herr Beglerbeg",
han ich gstottrt, "is des eier Ballett?"
"Jo", hat de Beglerbeg
gelacht un hat geruft: "Tanze!"
Un dem Moment han die zwelf
Weiwr - ihre Seidekleidr falle geloss — naja,
des wor schun bal wie des Schtripdis heitzutach,
nor owe un une han se noch bissche anghat. E Musich
hat gspielt, un die Trutschle han getanzt!
No ne Weil hat de Beglerbeg
in die Händ geplätscht un gsaat: "Genuch!"
No hatr mir ins Ohr gepischpert: "Des is mei
Harem!"
"Dei—was?"
- De Beglerbeg hat mich gross
angschaut un hat gfroot: "Na, saa mr mol, du
Matz ben Matz, wieviel Weiwr hascht du dann?"
"Ich? Nur ens. Mei Bäsl
Kathi. Un die is mr schun manchmol zuviel!"
"Du armer Mann", ruft
de Beglerbeg verwunrt, "nor een Weib? Do schau
die zwelf do, des sin alli mei Weiwer! Un in meim
Sommergarte an de Betschkereker Stross, wu die Villagoria
steht, han ich noch e halwes Dutzend!"
Mir is de Schweess ausgebroch:
"Achzehn Weiwer?" Un ganz staat han ich
gfroot: "Un die han dich noch net vrruckt gemacht?"
De Beglerbeg hat gelacht un
hat uf eemol e Peitsch aus seinr Bauchbindn gezoo:
"Die selle sich mol ziehre!"
Ich sin aus eenr Vrwunerung
in die anr gfall. "Na, gut, gut", han
ich gsaat, "wann du 18 Weiwr hascht —
wieviel Kiner hascht du dann?"
De Beglerbeg hat e Weil gstudiert,
no hatr gsaat: "Genau weess ich des net, es
misse so an die 30—40 sin. Drei Omar, 5 Ibrahim
un 9 Mohammed — die Mädle interessiere mich
net. Aus dene kann mr ka Saldate mache!"
Ich han Maul un Nas un Ohre
ufgsperrt! Pletzlich hat de Beglerbeg gschmunzelt
un hat mr was ins Ohr gsaat. Mir hats de Ochtem
vrschlaa un ich han wiedr gstottert: "Nee,
nee, des geht net, ich sin jo verheirat un..."
"Wannscht mrs abschlaascht,
is s die greschti Beleidigung", saat zornich
de Beglerbeg, "un dann kummscht ins Gfängnis!"
Mir han die Knie gschlottrt.
De Schweess is mr de Buckl nunrgelaaf. Awr de Beglerbeg
hat schun so me hibsche Ding gewunk un schun wors
do un hat freindlich gelacht.
"Vorwärts — hol ne
mit", saat de Beglerbeg, "in de bloe Salon."
Die jungi Frau hat noch freindlicher
gelacht. Hat mich an de Hand ghol un gsaat: "Kumm,
mei Liebling!"
Im nämliche Moment stuppt
mr mei Bäsl Kathi de Ellboe in die Rippe un saat:
"Matz, steh uf, de Kiehhalter hat geblos, los
die Kuh naus!"
|
