Mundart: Manchmol
denk ich an die Bäsl Resi
(Der Beitrag
wurde beim Mundartwettbewerb
2001 mit
dem 3. Preis des Regierungspräsidiums Nordbaden ausgezeichnet)
Die Bäsl Resi war e
ganz bsondere Mensch. Heitzutaach tät mer saan, sie war
e Unikum odder e Original. Awer was is eigentlich e Original?
Ich tät saan e Mensch, der was eenmolig is in seiner Art,
net zu verwechsle mit keem anre uf de Welt, jemand, der
sich selwer trei bleibt, von der Wie (Wiege) bis ans Grab.
Irgend e gscheide Mann hat mol gsaat: E jede Mensch kommt
als Original uf die Welt, die meeschte sterwe awer als Kopie.
Von de Bäsl Resi kann mer des net behaupte. Sie is e Original
geblieb, bis de Herrgott se hemghol hat in sei Reich, in
die Ewigkeit.
Im Dorf is se allgemein
bekannt geween als die Reinersch Bäsl Resi, un ihre Mann
hat mer de Reiner Vedder Matz genennt. Mit "Bäsl" sen bei
uns alle ältre Weiwer angeredt genn, un mit "Vedder" alle
ältre Männer, aach wann mer net freind (verwandt) war mitnanner.
Ich gsiehn se noch
vor mer: Kleen un zierlich war se, un mit de Johre is se
immer klenner genn, un mer hat sich gewunnert, wievill Kraft
un Energie sich in so eener kleeni Person versteckelt. Die
physisch Kraft hat mit de Zeit nohgeloss, awer de starke
Wille is geblieb bis an ihre letzschte Taach.
Un noch ens is ihr geblieb
bis zum Tod, etwas, was ihre Originalität unnerstrich un
zu ihrer Person dezugheert hat wie's Amen in de Kerch: ihre
Aue. Bloo ware so, so bloo, daß mer mitte im Winder gement
hat, mer gsieht de Summerhimmel leichte. Meischtens hat
se e dunkles Kopptuch ufghat, un des hat dee bsondre Glanz
von de Aue noch verstärkt. Bei de Bäsl Resi is des Sprichwort
zugetroff: Die Aue sen de Spiggel von de Seel. Un je dernoh,
wie ihre Stimmung war, han ihre Aue sich verännert. Wann
se bsonderscht gut gelaunt war, noh han ihr Aue geglitzert
un gfunkelt, so wie wann tausend winziche Stäre (Sterne)
drin geween wäre. Zum Beispill wie se ihre zwaa Enkle am
eerschte Schultaach an de Hand ghat hat, des een rechts,
des anner links, un mit ihne de weite Weech dorch die Hauptgass
in die Schul stolziert is. Odder wie se's eerschti Mol ihre
Urenkelche im Arm ghat hat. Iwwers ganz Gsicht hat se gstrahlt
un gelacht, so, als wollt se saan: Schaut mol her, ihr Leit,
ich han etwas, was ke anre hat, des is meh wert wie alle
Reichtum uf de Welt.
Wann se de Schalch im
Gnack (Nacken, Genick) ghat hat, noh han sich die tausend
Stäre in tausend winziche Teiwelcher (Teufelchen) verwandelt.
Bsonderscht, wann se ihre Vedder Matz ufziehe wollt. "Was
gett's dann heit Gudes zu esse?" hat er se als manchmol
gfroot, un sie hat manchmol druf geantwort: "Schneckeschwänz
un Ometzeherner!" (Ameisenhörner), un die Teiwelcher in
ihre Aue han schelmisch gelächelt.
Wann se zornig war,
noh han sich die tausend Stäre in tausend kleene Blitze
verwandelt, un es is net rotsam geween, se noch meh zu reize.
Un wann se traurig war,
noh hat sich e dunkle Schatte iwwer ihre Aue geleet, un
's war, wie wann de Sommerhimmel mit schwarze Wolke iwwerzoo
geween wär.
Awer wann se von Amerika
verzählt hat, han ihre Aue e schwärmerische Glanz kriet.
Es war, wie wann se von eem wunnerscheene Traam verzählt
hätt: Mit fufzehn Johr is se mit paar anre junge Meed uf
Amerika ausgewannert, weil ihr die Feldarweit dehem nimmi
gfall hat. Un dort, in Cincinnati, hat se die schenschti
Zeit in ihrem ganze Lewe verbrung. Sie hat ihre Bauretracht
abgeleet un sich in e eleganti jungi Miss verwandelt. Un
uf Jo-Nee (im Nu) hat se fließend Englisch gelernt, ohne
Schul un ohne Bicher. Im eem Spital hat se als Putzfräulein
angfang zu arweide un hat sich in drei, vier Johr zur Pflegekraft
nufgearweit. Un wie se neinzehn war, hat se ihre Vedder
Matz kennegelernt un bal dernoh gheirat. Er war aach e Landsmann
aus'm Banat. E Amerikaner oder e anre Fremde, hat se uns
verzählt, wär iwwerhaupt net in Frage komm. Er hat als Vorarweiter
in eener Maschinefabrik gearweit un scheen verdient. Un
wann se aach hart han misse arweide un's Unglick se manchmol
getroff hat - zwaa von ihre vier kleene Kinner sen gstorb
-, han se's Lewe in Amerika doch genoß: Jede Sonntach han
sich drei, vier junge Ehepaare getroff, mol do, mol dort,
un han mitnanner gfeiert, getanzt un gsung odder sie sen
mol dohin gfahr un mol dorthin un han sich alles angschaut:
die eerschte Stummfilme, de Städtische Tiergarte, die ville
scheene Parkanlage, de Ohio-Fluß, die moderne Schlächtereie
am Stadtrand un die neie Hochhäiser. Un weil's ne so gut
gfall hat in Amerika, han se aach dort bleiwe wille un han
die Alde, der Bäsl Resi ihre Eltre, iwwerredt nohzukomme.
Die sen aach komm, awer net lang geblieb. Noh eem Johr sen
se nomol zuruckgfahr in die alt Heimat, weil se sich ans
moderni Lewe in eener amerikanisch Großstadt net geweehne
han kenne. Kaum ware se dehem, han se angfang 's Resi mit
Briefe zu bombardeere: Sie soll doch mit'm Mann un mit de
Kinner "hemkumme", sie wäre alt un krank un sie hätte doch
niemand wie's Resi. Die Bäsl Resi war net so ingsprengt
(begeistert) von dem Vorschlaach un ihre Mann noch wenicher.
De Kampf hat fenf, sechs Johr lang gedauert, bis die Tochter
nohgenn hat. 1921 is se mit de zwaa Kinner zuruckgfahr ins
Banat. Noh eem halwe Johr is de Vedder Matz nohkomm. Awer
gäre sen se net "hemkomm", weil Amerika inzwischen ihre
Heimat genn war. Zwaa große Kischte un 5 Kupfre (Koffern)
han se mitgebrung aus Amerika mit Spillsache un Kinnerkleeder,
Bettwäsch, Eßbesteck, Porzellan un allerlei Hausrat, e Grammophon
mit amerikanische Platte, un Handarweide, die was die Bäsl
Resi in Amerika genäht, gstickt odder ghäkelt hat. Die meeschte
Sache ware noch bis in die Sechzicher Johre im Gebrauch.
E Wandbehang mit blooem Kreizstich hat e Ehreplatz im Wohnzimmer
kriet, un de Spruch druf hat sei Gültigkeit nie verlor:
Deutsches Haus im fremden Land
schirme Gott mit starker Hand.
Soball se sich entschloß
ghat han zu bleiwe, han se sich angepaßt. Die Bäsl Resi
hat ihre elegante Kleeder un de scheene Hut abgeleet un
is nomol in die eenfachi Bauretracht gschluppt. Niemand
hat se dezu gezwung, awer sie wollt demit saan: Ich paß
mich an die Dorfgmeenschaft an. Ich will net annerscht sen
wie die anre! Von dem ersparte Geld, paar tausend Dollar,
han se 10 Joch Feld kaaft un sen Baure genn. Awer die Umstellung
war net leicht. Etwas hat die Anpassung noch schwiericher
gemach: Wie se ausgewannert sen vor'm Eerschte Weltkriech,
hat's Banat zu Östereich-Ungarn gheert. Wie se 1921 zuruckkomm
sen, war's Land geteelt: zwaa Drittel han zu Rumänien gheert,
de anre Teel war jugoslawisch. Unser Dorf war jetz rumänisch
un hat nor paar Kilometer von de Grenz gelee. Awer Rumänisch
han se nie richtig gelernt. Mer hat sich jo iwwerall mit
Deitsch dorchschlaan kenne. Meh wie zwaa, drei Dutzend rumänische
un ungrische Werter han se allzwaa net gekennt. Sie han
gsaat, sie wäre schon zu alt for fremde Sproch lerne. Ich
menn awer, 's hat ihne aach die Ambaschúr (Eifer, Lust;
aus dem Französischen) gfehlt. Wie 1967 ihre ältsche Enkel
gheirat hat un die Gäscht aus Amerika komm sen - de "Eiserne
Vorhang" war grad gfall -, hat die Bäsl Resi Englisch mit
'ne geredt, so wie wann se nie aus Amerika ausgewannert
wär.
Bei alle Leit is die
Bäsl Resi arich (arg=sehr) beliebt geween, aus villerlei
Ursache. Eerschtens weil se gutherzig un freigewig war.
Immer hat se noh de Devise ghandelt: "Ich han net vill,
awer der anner hat noch wenicher. Ich genn em e bissi was
von dem, was ich net brauch, daß er aach was hat." Noh'm
Kriech war die Not jo iwwerall groß. 's hat an alle Ecke
am Notwendichschte gfehlt, oft sogar am tägliche Brot. Un
so hat die Bäsl Resi immer gäre ausgeteelt, was se grad
so ghat hat: mol e Kerbche Erdbiere im Friehjohr, mol e
Schorz voll Grumbiere im Summer, mol e Klutz Trauwe un e
paar Quetsche im Herbscht, mol e Säckche Kukruz (österr:
Mais) im Winder.
In de Nochberschaft
han die Weiwer se immer gäre um Rot gfroot. Gudi Nochberschaft
hat bei uns vill gezählt un nix gekoscht, weil se selbstverständlich
war. Un weil die Bäsl Resi als junge Mensch lange Johre
in Amerika geween war un dort im Spital gearweit un dedriwwer
naus aach sonscht vill praktischi Erfahrung gsammelt hat,
han die Leit se bsonderscht eschtimiert (franz.: estimer=achten)
un se immer gäre um Rot gfroot, wann se nimmi weider gewißt
han. An so e Vorfall kann ich mich noch genau erinnre. Meer
Kinner ware, wie so oft, bei de Bäsl Resi unnerm Maulbierebaam
un han gspillt, während sie selwer in de Kich gekocht hat.
Uf eemol geht's Gassetierche uf un die Hochstrassersch Bäsl
Amei, die Nochberin iwwer de Gass, etwas iwwer 70, humpelt
bloßfissich mit kalchweißem Gsicht in de Hoff. Ihre lange
schwarze Trachterock hat se mit eener Hand bis zum Knie
nufgezoo. Aus ihrem linke Been, e Handbreet iwwerm Knechel,
is e dicke Blutstrahl gschoss, mol stark, mol schwach, so
wie's Herz gepumpt hat. Uf'm Erdbode is e zickzacklichi
Spur zuruckgeblieb. Unser Hund is hingelaaf un hat dran
gschnuffelt un geleckt, awer er hat glei die Schnauz verzoo
un sich gschittelt. Un die Bäsl Amei hat als geruf: " Bäsl
Resi, Bäsl Resi, helft mer! Ich weeß net, was ich mache
soll!" Die Bäsl Resi hat die Hänn iwwerm Kopp zammgschlaa:
"Um Gottes Wille, Bäsl Amei, was is dann passiert? Ihr blut
jo wie e abgstochnes Schwein!" "Ich sen vom Nochber sei'm
Hund gebiß genn, un's heert nimmi uf zu blude, trotzdem
ich die Wund schon zugebunn ghat han", hat die Bäsl Amei
gejoomert. "Meer is schon ganz schlecht." "Ke Wunner! Des
is jo e ganz dickes Loch direkt in de Oder (Ader). Ihr hat
bestimmt schon e Massa Blut verlor. Hockt Eich mol do uf
de Stuhl, meer misse sofort's Blut stille." Mit eem Ruck
hat se sich 's Kopptuch runnergeriß, handbreet gfalt un
unner de Bäsl Amei ihre Knie gschlung. "Kinner, helft mer
mol!", hat se gsaat. "Meer misse des Tuch ganz fescht zubinne.
Richtig abschniere. Noch e bissi feschter! So is gut." In
dem Moment hat die Bäsl Amei die Aue verdreht un de Kopp
is ihr bal in de Schoß gfall. Weg war se! Ohmächtig. Mit
Mieh un Not han mer se mitnanner ufs Kannebett (Sofa; aus
dem Französischen Kanapee) gschleppt, ihr e dickes Kisse
unner die Fieß un e nasses Tuch uf die Stern geleet, bis
die Bäsl Amei noh e paar Minute nomol zu sich komm is. Noh
eener halb Stun hat die Bäsl Resi de Feschtverband gelockert,
die Wund sach- un fachgerecht gereinicht un verbunn, der
Nochberin e Haussalb in die Hand gedrickt un des alt Weib
hem begleet. Sie hat ihr ingschärft, wie se sich verhalle
un wie se die Wund behandle soll. Trotzdem is sie selwer
alleritt (häufig, immer wieder) niwwergelaaf un hat nohgschaut,
wie's de Nochberin geht. Un die Wund is ohne Komplikatione
un ohne Dokter gheelt, un uf des war die Bäsl Resi arich
stolz, aach wann se ke Wort dedriwwer verlor hat. Bscheidenheit
war nämlich aach eeni von ihre ganz große Tugende.
Kinner hat die Bäsl
Resi liewer ghat wie alles anri uf de Welt. Immer ware drei,
vier, fenf um se rum. Un oft hat se gejer alle "Erziehungsprinzipien"
verstoß, ganz so, wie's Herz ihr des diktiert hat. Manchmol
war des e heimlichi Komplizenschaft gejer die Eltre. Harmlos,
awer pädagogisch doch net ganz richtig. Wann ich dran denk,
muß ich lache: Im Friehjohr, mit de eerschte Sonnestrahle,
han paar von uns Kinner jedes Johr Sommersprosse kriet.
Scheckatze hat mer se bei uns genennt. Ziemlich groß ware
se un net nor uf de Nas, sondern im ganze Gsicht verstraut.
Es hat wirklich ausgschaut, wie wann mer mit nassem Gsicht
in e Sack voll Kleie geblos hätt un die Kleie im Gsicht
hängge geblieb wäre. Klor, daß manche von unsre Klassekumrade
uns desweje gfoppt han. "Kleieforzer" han se uns verspott.
Un weil die Fopperei ke End ghat hat un meer so gekränkt
ware, hat die Bäsl Resi irgendwann gsaat: "So! Wann die
beese Buwe eich nomol ärchre, noh saat ihr ne folgendes
Sprichl: 'Scheckatze sen Menscheflecke, wer se net leide
kann, soll mich am Arsch lecke!'" Un sie hat ihre Finger
uf de Mund geleet un gsaat: "Pscht! Awer verroot mich jo
net! Sonscht krien ich Ärcher mit eier Mutter. Ich weeß,
daß ihr net so ordinär redde sollt." Un aus ihre Aue han
tausend kleene Teiwelcher schelmisch gelächelt. Un wirklich:
Des Sprichl hat gholf, un derzeit han die Spottveegel uns
in Ruh geloss. Die Botschaft, die uns die Bäsl Resi uf die
Art vermittelt hat, war folgendi: Loßt eich net alles gfalle!
Wehrt eich! Net mit de Fauscht un net mit'm Knippel, sondern
mit Werter.
Wann ich an die Bäsl
Resi denk, muß ich manchmol schmunzle. Sie hat geredt, wie
ihr de Schnawwel gewachs war, echt un unverfälscht. In ihrem
Wortschatz hat se paar uralde Werter ghat, die mer sonscht
ninderscht gheert hat. "Seid nor net so unvergniecht", hat
se gsaat, wann mer schier unersättlich ware, un sie hat
uns gelehrt, daß mer in allem Mooß halle soll. Wann mer
ihr han solle helfe un ke Luscht dezu ghat han, hat se gsaat:
"Och, Kinner! Seid nor net so pessich! (störrisch, dickköpfig)
Ich han aach ke großi Ambaschur, awer die Arweit muß gemach
genn".
Wann meer Kinner mol
allzu ausgeloss un iwwermiedich ware, hat se gsaat: "Kinner,
seid nor net so talkich!" (albern, kindisch) odder "Seid
nor net so ungattich!", un so hammer gelernt, daß mer nix
iwwertreiwe soll. "Du Bójazzl, du!" (aus dem ital. Baiazzo)
hat se als gutmiedich gschennt, un des hat bedeit: "Du Narr,
du verruckte!", awer zu de Meed hat se gsaat: "Du Urschl,
du närrsches!" (von Ursula). Die Zimmerdeck war "de Plafoon",
die blechni Waschschissel "de Lawór" un "alért" war e lebhafte,
muntere Mensch. E nidderträchtiche Mensch hat se "Karnáli"
(Kanaille) genennt. Heitzutaach heert mer solche Werter
nimmi. Ich menn als grad, die Bäsl Resi hat se mit ins Grab
ghol.
Hilfsbereitschaft.
Jede Taach, mol klenner, mol greeßer. For e Dankscheen odder
noch wenicher. "Des kann ich net, des han ich noch nie gemach",
hat's bei de Bäsl Resi net genn. An eem Sommertaach, meer
Kinner han grad Nohlaafches gspillt un die Bäsl Resi hat
Grumbeere gschält, is 's Gassetierche ufgeriß genn un die
Bäsl Nani, die Nochberin von rechts, ruft un schrait: "Bäsl
Resi, Bäsl Resi, kommt mol riwwer! Mei Jokob (Jakob) leit
im Bett un is tot! Vor eener Stun hat er noch mit mer geredt."
Die Bäsl Resi hat alles falle un leie geloss, is zu de Nagel's
Bäsl Kathi gelaaf, die Nochberin links, hat ans Fenschter
gekloppt un geruf: "Bäsl Kathi, kommt helft mer mol! De
Mayer Jokob is gstorb!" Sie sen niwwer zu Mayersch ins Schlofzimmer
gang, han uns Kinner weggejaat un nausgsperrt. Meer han
awwer dorchs Schlisselloch geguckst un gsiehn, was drin
passiert is. Die Bäsl Resi un die Bäsl Kathi han em Vedder
Jokob 's Schlofhimmit ausgezoo, sei Gschlecht mit eem Handtuch
zugedeckt un de Vedder Jokob von Kopp bis Fuß gewäsch. Die
Bäsl Nani war vor lauder Ufregung for nix zu gebrauche,
un die zwaa Weiwer han sich mächtig geploot, beim Hewe un
Rumdrehe. De Vedder Jokob war e schwere Mann un die zwaa
Weiwer ware kleen un schwach un aach nimmi die Jingschte,
neegscht an die Siebzig. Wie er gewäsch war, han se'm e
weißes Himmit un de schwarze Sunndachsanzug angezoo, han's
Bett frisch iwwerzoo un de Vedder Jokob drin leie geloss,
bis die Todelad komm is. Sie han's Schlofzimmer sauwer gemach,
iwwerall ufgeraamt, Kerze angebrennt un e schwarzes Tuch
vor de Spiggel ghängt. Inzwischen war die Nichte mit ihrem
Mann vom anre Dorfend gerennt komm, un die zwaa alde Weiwer
han kenne hemgehn. An dem Taach han mer um zwelf Uhr nor
e Schmalzbrot kriet un eerscht am Owed zu Mittach gess.
Wann ich an de Bäsl
Resi ihre Kochkunscht denk, laaft mer's Wasser im Maul zamm.
In ihrer Kich is gekocht genn, was sich an Rezepte aus de
Urheimat, aus der Nei Welt un aus'm Banat so angsammelt
hat: Inmachsupp, - e Gfliggelsupp mit Grieskneedle un Summergmies
-, gfillte Kerwus (gefüllter Kürbis) un Kulrawe, saure Niere,
Paprikasch (Gulasch), Grumbiersupp un Quetschekuche, Weißkraut
mit geraachter Worscht, gfillte Paprika, gebacknes Hähnche,
Kerschestrudl, Aprikose- un Quetschekneedle, Zitrone-Pie,
Honichbussle un Flammkuche mit Speck un Rahm. Weider will
ich nimmi ufzähle, sonscht krien die Leser e wassriche Mund.
Anscheinend hat die Bäsl Resi sich e Lewe lang an de Spruch
ufm Wandbehang in ihrer Kich ghall. Der hat folgende Wortlaut
ghat:
Den Mann ans Heim so fesselt man:
Wenn viel und gut man kochen kann.
De Speiseplan war von
de Tradition her genau feschtgeleet: Montach, Dienschtach
un Freitach hat's ke Fleisch genn, de Samschtach war mol
mit, mol ohne Fleisch. Die fleischlosi Koscht - z.B. Grumbiere
un Nuddle - hat uns Kinner net immer gschmeckt, awer meer
han alles gess, was uf de Tisch komm is. Meer sen net schnausich
geween. In eem Punkt war die Bäsl Resi altmodisch. 's Koche
wär nix for Männer, hat se behaupt. Nor die Meed han in
ihre Kich därfe un koche lerne. Schad drum! Do hätt mer
sich manches abschaue kenne!
Kurasch, Mut, Unerschrockenheit!
Eemol nachts, mitte im Summer, is se wackrich genn. De Vedder
Matz un die Kinner han gschlof. 's Fenschter war uf wejer
der groß Hitzt, awer der Bäsl Resi war's so aartlich zu
Mut (eigenartig, seltsam) daß se ke Schlof gfunn hat. Uf
eemol heert se vom Stall riwwer was ruschple. 's eerscht
hat se gement, des wär 's Viech, awer noh hat se Mannsstimme
gheert. Sie is ganz staad (leise) ufgstann, hat de Zimmerbesm
verwischt, die Tier ufgemach un hat angfang mit'm Besm zu
fuchtle, zu schenne un zu schraie: "Was is dann los do driwwe!
Willt ihr uns die Peerd stehle? Schämt ihr eich net, de
Leit die Nachtruh zu rauwe?! Ihr Gsindel, ihr dreckiches,
Bagasch, iwwerenanner! Schaut, daß ihr weiderkommt!
Matz, komm mol raus, meer han Bsuch!"
In dem Moment sen zwaa Gstalte ausm Stall gerennt un sen
mit Rieseschritte dorch de Hoff in de Garte gelaaf. Wie
de Vedder Matz rauskomm is, ware se schon iwer alle Berche
verschwun.
Würde!
Des hochdeitschi un vornehmi Wort hat die Bäsl Resi nie
benutzt, un wahrscheinlich hätt se's aach net genau erkläre
kenne. Awer gelebt hat se's Taach for Taach. Alle Schicksalsschlääch
hat se mit Würde getraa: de Tod von zwaa kleene Kinner,
de Abstieg vom eem moderne Stadtmensch in Amerika,- die
Missis Reiner in Cincinnati -, zum eenfache Baureweib -
die Bäsl Resi in eem Banater Dorf -, de unverhoffte Tod
von ihrem Vedder Matz, während er bei der Amerikanisch Botschaft
in Bukarest 's Rückwanderungsgsuch engeraicht hat. Aach
de allerhärtschte Schlaach, die Enteignung dorch die Kommuniste
noh'm Zwette Weltkriech, hat se mit Würde getraa. Alles,
was sie un ihre Vedder Matz sich erspart un erarweit ghat
han, 's Haus un's Feld, e Teel vom Hausrat un's Viech, alles
han sich die Kommuniste unner de Nagel geriß. Die Enteignungskommission,
35-40 Männer, meischt Koloniste aus Altrumänien, is von
Haus zu Haus gang un hat alles requiriert. Umsonscht hat
die Bäsl Resi gschennt un getobt: "Is sowas menschemeeglich,
daß mer de Leit ihre Sach (Hab und Gut) wegholt? Wie kann
unser Herrgott des zulosse? Schämt ihr eich net, ihr Raawre
(Räuber)? Ihr hat ke Finger krumm gemach for unser Sach!
Gsindel beigelaafnes!". Zum Glick han die meeschte Kommissionsmitglieder
net Deitsch verstan, awer de Kommissionschef hat zum Dolmetscher
in scharfem Ton gsaat: "Saa der Alt, sie soll ihre Maul
halle!" Un so hat alle Schennerei nix genutzt, un meer hat
sich jo aach net gerichtlich wehre kenne, weil's Recht un
die Gerechtigkeit gstorb ware. Die Bäsl Resi hat sich wie
alle anre Leit ins Unabännerlichi fiege misse. Awer tief
in ihrem Herz drin war se iwwerzeit, daß de Herrgott irgendwann
doch noch for Recht un Gerechtigkeit sorcht un die Leit
ihre Sach zuruckkrien. Awer sie hat's leider nimmi erlebt.
Wann ich an die Bäsl
Resi denk, krien ich manchmol feichte Aue: De Hoff is schwarz
von Mensche. Sogar uf de Gass stehn noch vill Leit. Meer
heert die Glocke laude, un bal druf is de Parre mit de Ministrante
in de Hoff getret. Un wie de Kerchechor ens von dee uralde
Trauerlieder gsung hat, hat mer gemennt, 's is die Bäsl
Resi selwer, die was sich von deere (dieser) Welt verabschied:
Liebe Freunde, schweigt, nicht weinet,
stellet eure Klagen ein!
Einst kommt der Tag, der uns wieder vereinet,
Gott wird euer Tröster sein...
Un während uns die Träne
iwwer die Backe gekullert sen, han mer ghofft, daß es irgendwann
e Wiedersehn gett. Irgendwo, in eener besseri Welt. Wann
ich an die Bäsl Resi denk, krien ich manchmol feichte Aue.
Sie war mei Oma.
© 2001 banat.de . Veröffentlicht mit freundlicher
Genehmigung des Autors
