Banat.de::Kultur-Mundart: Verschiede

QUO VENI ?

Zur Verdeutlichung der engen Verwandtschaft der Banater und der Pfälzer Mundart, sei hier ein preisgekröntes Gedicht in Pfälzer Mundart wiedergegeben. Es wurde mit dem 1. Preis beim Mundartwettbewerb 2001 des Regierungspräsidiums Nordbaden prämiert.

Verschiede

De Himmel isch bloo un d'Wolke sin weiss
un werre se groo, isch de Reche nit weit.
De Borre isch braun un d'Sunn häß un gäl,
un d'Blätter farwich an em herbschtliche Bääm.

Refr.: D'Natur isch verschiede in Farwe un Form,
verännert sich stännich, isch nit wie genormt.
Des bringt in unser Läwe ä bunte Mischung nei.
Warum sollt's bei de Mensche dann anerschder sei?

De Sparchel wachst grad, d'Banan ziemlich krumm,
die Gurke sin länglich un d'Krautkepp sin rund.
De Persching isch samtich un d'Kersche sin glatt,
die Kiwis stachlich un die Walniss hart.

Refr.: D'Natur isch verschiede in Farwe un Form,
wachst grad un wachst krumm un nit wie genormt.
Des bringt in unser Läwe ä bunte Mischung nei.
Warum sollt's bei de Mensche dann anerschder sei?

Ä Maisel isch klää, d'Giraff grouß un lang,
die Fisch brauchen s'Wasser un d'Echse de Sand.
Ä Schneckel schleicht langsam, än Ticher rennt schnell,
de Krebs hott en Panzer un de Eisbär ä Fell.

Refr.: D'Natur isch verschiede in Farwe un Form,
wachst grouß un wachst klää un nit wie genormt.
Des bringt in unser Läwe ä bunte Mischung nei.
Warum sollt's bei de Mensche dann anerschder sei?

De äänd kann gut dess, de anner gut sell,
de äänd, der isch dunkel, de anner isch hell.
De äänd babbelt Houchdeitsch, de anner d'Muddersprooch,
de äänd kummt vun auswärts un de anner vun do.

Refr.: Mer Mensche sin verschiede, s'hot jeder sei G'sicht,
sei Art un sei Herkunft un sei eicheni G'schicht.
Des bringt in unser Läwe ä bunte Mischung nei.
Warum sähn des blouß mansche heit immer noch nit ei?

Mer Mensche sin verschiede,- "verbiete, verbiete"
Mer Mensche sin verschiede,- "abschiewe, abschiewe"
Mer Mensche sin verschiede,- "bekrieche, bekrieche"

Mer Mensche sin verschiede, s'hott jeder was zu biete....-
s'hot jeder sei G'sicht, sei Art und sei Herkunft und sei eicheni G'schicht.
Des bringt in unser Läwe ä bunte Mischung nei.
Wann werd des endlich fer jeden uff dere Welt selbstverstännlich sei?

Text und Musik: Traudel Kern